افسرماہ پوری
الٰہی سہل میری زندگی کے امتحاں کردے
زمیں کو گل بداماں آسماں کو مہرباں کردے
یہ قطرہ ہے اسے پھیلا کے بحرِ بے کراں کردے
یہ ذرّہ ہے اسے چمکا کے مہرِ ضوفشاں کردے
بھٹک پائے نہ کوئی راہ رو راہِ صداقت سے
مرے حرفِ دعا کو تیرگی میں کہکشاں کردے
قدم اٹھتے نہیں اب تشنگی سے دھوپ میں یارب
رہِ منزل پہ اپنی رحمتوں کا سائباں کردے
چمن میں جو بھی آتا ہے وہ تنکے نوچ لیتا ہے
خدایا اور اونچی میری شاخِ آشیاں کردے
یہی ہے آرزو میری یہی ہے جستجو میری
مری حمد و ثنا کو تو دلوں کا ترجماں کردے
مرے ایماں کی کشتی بے خطر ساحل پہ جاپہنچے
کچھ اس انداز سے رخ پر ہوا کے بادباں کردے
تو اپنے فضل سے افسرؔ کی حمد و نعت کو مولا
عطا لطفِ زباں کردے، عطا حسنِ بیاں کردے
0 تبصرے