بولو وہ کون ہے؟ نظروں سے جو رہ کرپنہاں ایک اک شے کے پس پردہ ہے جلوہ افشاں

ڈاکٹرمنشاء الرحمن خان منشاء

بولو وہ کون ہے؟ نظروں سے جو رہ کرپنہاں
ایک اک شے کے پس پردہ ہے جلوہ افشاں
بولو وہ کون ہے؟ دیتا ہے جو سامانِ حیات
ہم کو بن مانگے عطا کرتا ہے کیا کیا نعمات
بولو وہ کون ہے؟ یہ دھرتی سجائی جس نے
چرخ پہ چادر نورانی بچھائی جس نے
بولو وہ کون ہے؟ جو قادر و قیوم بھی ہے
ہردوعالم کا جو مسجود بھی مخدوم بھی ہے
بولو وہ کون ہے؟ نازل کیا جس نے قرآں
اس میں صادر کئے حکمت بھرے کتنے فرماں
بولو وہ کون ہے؟ جو رزق عطا کرتا ہے
جس کی مرضی کے بنا پتہ بھی نہیں ہلتا ہے
بولو وہ کون ہے؟ ہر امر پہ قدرت والا
جس سے بڑھ کر نہیں ہے کوئی بھی حکمت والا
جس نے پیدا کیا انساں کو بطرزِ احسن
زندگی کرنے کے پھر اس کو سکھائے ہیں چلن
جس نے مخلوق میں انساں کو بنایا اشرف
کون ہے وہ؟ جو ہے سجدوں کا ہمارے حقدار
ہر قدم پر ہمیں اس کی ہی مدد ہے درکار
ایسی ہستی تو بجز رب العلیٰ کوئی نہیں
لائق حمدوثنا اس کے سوا کوئی نہیں