اے خالق رب العلا اے مالک ارض و سما

یونس انیس

اے خالق رب العلا
اے مالک ارض و سما
اے ذات باری اے خدا
تو لائق حمد و ثنا
روز و شب صبح مسا
ہم سب ترے مدحت سرا
الحمدللہ سب نور نور
ہر سمت بس تیرا ظہور
یہ کوہ یہ دشت و طیور
سب کلمہ گو تیرے حضور
پروردگار جز و کل
آب و گل و ہر خار و گل
سب سے بڑا سب سے عظیم
تو صاحب لطف عمیم
محتاج ہم سب تو نعیم
رحمن تو ہے تو رحیم
اے کردگار انس و جاں
تو رحم والا مہرباں
ہم عاصی دامن تہی
از بسکہ ہے شرمندگی
اک آسرا ہے بس یہی
لا تقنطوا من رحمتی
لاریب فیہ اے خدا
تو مالک روزِ جزا
یا ربنا، یا ربنا
جو راہ حق ہے حق نما
وہ راہِ حق ہم کو دکھا
گم کردہ راہوں سے بچا
فیضانِ جنت ہو مدام
نارِ جہنم ہو حرام