وہ شاہ، سب ہیں گدا لا الہ الا اللہ ہے کون اس سے بڑا لا الہ الا اللہ

ڈاکٹرنسیم

وہ شاہ، سب ہیں گدا لا الہ الا اللہ
ہے کون اس سے بڑا لا الہ الا اللہ
پیامِ غارِ حرا، لا الہ الا اللہ
نبیؐ کی پہلی صدا لا الہ الا اللہ
اذاں کی آئی صدا لا الہ الا اللہ
تو گونجے ارض و سماء لا الہ الا اللہ
کبھی یہ مشعل توحید بجھ نہیں سکتی
چلے کوئی بھی ہوا، لا الہ الا اللہ
یہ بحروبر، یہ زمیں، آسماں یہ شمس و قمر
وہی ہے سب کا خدا، لا الہ الا اللہ
یہی وظیفہ ازل سے ہے ساری خلقت کا
ندائے ارض وسماء لا الہ الا اللہ
شعاع مہر جو پھوٹی افق سے وقتِ سحر
تو بادلوں پہ لکھا، لا الہ الا اللہ
عدو ہے سارا زمانہ تو کیا خدا تو ہے ساتھ
کسی سے خوف نہ کھا، لا الہ الا اللہ
وہی ہے آسرا ٹوٹی ہوئی امیدوں کا
دکھے دلوں کی صدا، لا الہ الا اللہ
تو لوحِ دل پہ رقم کر اسے بہ خطِ جلی
یہی ہے نقشِ شفا لا الہ الا اللہ
اسی سے چمکے گا آئینہ تیرے باطن کا
یہی ہے دل کی جلا لا الہ الا اللہ
اسی سے مانگ تجھے، جو بھی مانگنا ہے نسیمؔ
وہی سنے گا دعا، لا الہ الا اللہ