ہے فہم و فراست ترے افکار پہ شیدا

ہے فہم و فراست ترے افکار پہ شیدا

ہے فہم و فراست ترے افکار پہ شیدا
تاریخ تری سیرت و کردار پہ شیدا

عرفان تری شان پہ سو بار ہے قرباں
وجدان و تصوف ترے اسرار پہ شیدا

ادراک کے نقطے تری سوچوں پہ فدا ہیں
لفظوں کے معانی ترے اظہار پہ شیدا

مازاغ کے الفاظ، حسیں آنکھ پہ صدقے
ہے حسن تمھارا لب و رخسار پہ شیدا

’’واللیل‘‘ کی آیت تری زلفوں کی ثناخواں
’’والشمس‘‘ ترے چہرے کے انوار پہ شیدا

ہے سیرتِ سرکار ہی قرآن کی تفسیر
آیات کا مفہوم ہے سرکار پہ شیدا

بس روضے کی تصویر تصور میں بسی ہے
ہے شوقِ مسافت ترے دربار پہ شیدا

معراج کی شب جلوۂ حق دیکھنے والے!
آفاق ترے دیدۂ بیدار پہ شیدا
ابراہیم حسان (پنجاب)

ایک تبصرہ شائع کریں

0 تبصرے