مجھ پہ اے میرے خدا اور بھی احساں کردے ہیں جو بیمار سے چہرے انہیں شاداں کردے

عبیدالرحمن عبید

مجھ پہ اے میرے خدا اور بھی احساں کردے
ہیں جو بیمار سے چہرے انہیں شاداں کردے

مثلِ حشراتِ زمیں یوں نہ بنا ان کو خدا
تونے انساں بنایا ہے تو انساں کردے

میرے مالک تری قدرت ہے ہراک شے کو محیط
تو جو چاہے کسی مایوس کو حیراں کردے

تو ہی مظلوم کی طاقت توہی بے بس کا یقیں
ہر دکھی دل کے لئے راحتیں ارزاں کردے

تو جو چاہے تو سمندر بھی ہو کوزے میں نہاں
تو جو چاہے کسی قطرے کو بھی طوفاں کردے

نور ہی نور ہے تو نور علی نور ہے تو
شب گزیدوں کے لئے صبح کا امکاں کر دے

تلخی زیست کے کچھ گھونٹ تو شیریں ہوں عبیدؔ
چند سانسیں تو غریبوں پہ بھی آساں کردے