لکھنے کا شوق جب کہ مجھے حمدِ حق ہوا

اظہارِ عاجزی
رحمت الٰہی برقؔ اعظمی

لکھنے کا شوق جب کہ مجھے حمدِ حق ہوا
سینہ قلم کا رعبِ جلالت سے شق ہوا
نعتِ رسولِ پاکﷺ کا جس دم ہوا خیال
رنگِ عروسِ فکر خجالت سے فَق ہوا
سوئِ ادب کے خوف سے لرزہ تھاجسم میں
چہرہ وفورِ عجز سے غرقِ عَرَق ہوا
عہدہ برآ ہوا نہ کسی ایک سے بھی جب
میں کیا بتاؤں دل کو جو میرے قَلَق ہوا
ناگاہ برقؔ ہاتفِ غیبی نے دی ندا
اظہارِ عاجزی ترا مقبولِ حق ہوا