آگہی ذوالجلال والاکرام روشنی ذوالجلال والاکرام

لطیف اثرؔ

آگہی ذوالجلال والاکرام
روشنی ذوالجلال والاکرام

تیرے محبوبؐ سے ملی دل کو
تازگی ذوالجلال والاکرام

کر عطا مجھ سے کور باطن کو
روشنی ذوالجلال والاکرام

کیوں ہمارے چمن میں پھیلی ہے
بے کلی ذوالجلال والاکرام

تجھ سے مانگے ترے کرم کی بھیک
بے خودی ذوالجلال والاکرام

کردے پوری جو مجھ میں باقی ہے
ہر کمی ذوالجلال والاکرام

کر عطا جس سے غم کی ہو تکمیل
وہ خوشی ذوالجلال والاکرام

ظلمتوں میں اثرؔ کو دے اپنے
روشنی ذوالجلال والاکرام