میرا ہر تیر حوالے کردے لا کے نخچیر حوالے کردے

بدر نظیریؔ

میرا ہر تیر حوالے کردے
لا کے نخچیر حوالے کردے
دے کے تقدیر بے بہا مت پوچھ
حسنِ تدبیر حوالے کردے
مٹ گیا ہے ورق ورق سب کچھ
میری تصویر حوالے کردے
جو بنائے ہدف ہر اک دل کو
وہ ہی اک تیر حوالے کردے
غیر کو بھی جکڑ لوں میں جس میں
ویسی زنجیر حوالے کردے
شرق تا غرب جس میں پیار اُگے
ایسی جاگیر حوالے کردے
خواب بے رنگ! لمحے ہیں پر سوز
سازِ تعبیر حوالے کردے
بزمِ دل میں ہے تیرگی کیسی
رقصِ تنویر حوالے کردے
نسخۂ کیمیا کی تجھ کو قسم
میرا توقیر حوالے کردے
ہو چکی ہے دعا، دوا سب کچھ
اب تو تاثیر حوالے کردے
چھین لے مجھ سے میرا میں لیکن
بدرِؔ دلگیر حوالے کردے