آتش نمرود تونے سرد کی تونے عیسیٰ کی بچائی زندگی

خضرؔناگپوری

آتش نمرود تونے سرد کی
تونے عیسیٰ کی بچائی زندگی
تونے یوسف کا رکھا قائم وقار
اے مرے مالک مرے پروردگار
نور بخشا دیدۂ یعقوب کو
دم میں اچھا کردیا ایوب کو
دی زلیخا کو جوانی کی بہار
اے مرے مالک مرے پروردگار
ہے عطا کی شان بھی کیا دیدنی
آگ کے طالب کو دی پیغمبری
ایک مانگے کوئی تو دے تو ہزار
اے مرے مالک مرے پروردگار
نوح کی کشتی کا تو ہی ناخدا
راستہ موسیٰ کو دریا میں دیا
تیری قدرت ہے جہاں سے آشکار
اے مرے مالک مرے پروردگار
تاجدار انبیاء کا واسطا
نعمت کونین اسے بھی کرعطا
خضرؔ بھی رحمت کا ہے امیدوار
اے مرے مالک مرے پروردگار