امیرالاسلام ہاشمی
حمد کے واسطے شائستہ بیانی دیدے
حرفِ لایعنی کو تو حسنِ معانی دیدے
جب بھی مصرعہ میں کوئی حمد کا لکھوں یارب
پردۂ غیب سے تو مصرعۂِ ثانی دیدے
حمد لکھنے کے لئے میرا قلم ہے بیتاب
صاحب لوح و قلم اس کو روانی دیدے
مانگنے کا ہی سلیقہ ہے نہ الفاظ میں ربط
ایک اک حرف کو توحسنِ معانی دیدے
دل کو سرسبز مرے، شبنمِ تسکین سے کر
کشتِ جاں سوکھ رہی ہے اسے پانی دیدے
تو مرے سامنے ہوکر بھی نہاں ہے مجھ سے
ربطِ پنہاں کی مجھے کوئی نشانی دیدے
تیری رحمت کے قصیدوں سے دہکتی دوزخ
سرد پڑنے لگے وہ شعلہ بیانی دیدے
0 تبصرے