الف لام میم! توہی قہار وجبار توہی رحمن ورحیم

ضمیرکاظمی

الف لام میم!
توہی قہار وجبار
توہی رحمن ورحیم
ازل سے ہے افق تابہ افق
یہ کائنات بیکراں
شام وسحرتسبیح خواں
ہراک شے میں تری تکریم
نہیں تیرے سواکوئی عظیم
گنگ ہے عقل سلیم!
تری بخشی ہوئی ارض وسماں کی اک کتاب
جیسے کوزے میں سمندر
طشتری میں آفتاب
عبودیت کاسرچشمہ
کہ جس کی ایک آیت ہے
کتاب علم کاسہ حرفی کرشمہ
صدیاں حیران وپریشاں
وقت عاجز
لمحے بے بس
کرتے ہیں تسلیم
یہی آغازتعلیم یہی انجام تعلیم
نہیں کرپائے اب تک جس کی تفہیم
الف لام میم!