عبرتؔ بہرائچی
خارزاروں کو گلستاں مرے مولیٰ کردے
ہر طرف دید کا ساماں مرے مولیٰ کردے
دیکھ لوں گنبدِ خضریٰ کو نظر سے اپنی
یہ بھی پورا مرا ارماں،مرے مولیٰ کردے
میرے دامن میں گناہوں کے سوا کچھ بھی نہیں
کچھ عطا دولت ایماں مرے مولیٰ کردے
راہ چلنے نہیں دیتے ہیںگناہوں کے سفیر
مشکلیں اب مری آساں مرے مولیٰ کردے
دل کے ہر تیرہ ئو تاریک صنم خانہ میں
شمع توحید فروزاں مرے مولیٰ کردے
میں بھی ہوں سید کونیںؐ کا اک ادنیٰ غلام
مجھ کو بھی خلد بداماں مرے مولیٰ کردے
نام لیوا نہ رہے ظلم کا دنیا میں کوئی
ایسا جاری کوئی فرماں مرے مولیٰ کردے
آنکھیں پرنم ہیں دوا مانگ رہا ہے عبرتؔ
اس کے اب درد کا درماں مرے مولیٰ کردے
0 تبصرے