تو خالق کل تو مالکِ کل زمیں تری آسمان تیرا مرے لئے بس یہی عبادت زبان میری بیان تیرا

عتیق ؔ الٰہ آبادی

تو خالق کل تو مالکِ کل زمیں تری آسمان تیرا
مرے لئے بس یہی عبادت زبان میری بیان تیرا
تری حقیقت کا راز ہے کیا کوئی بھی اب تک سمجھ نہ پایا
اسی پہ بس منکشف ہوا ہے جو ہو سکا میہمان تیرا
میں تیرے اوصاف کیسے لکھوں میں تیرے جلوئوں میں کھو گیا ہوں
کہاں نہیں آیتیں ہیں تیری کہاں نہیں ہے نشان تیرا
میں اپنی کشتی ترے بھروسے پہ بیچ طوفاں میں لے چلا ہوں
اب اس کے آگے تری مشیّت ہوا تری بادبان تیرا
سبھی کتابوں سبھی صحیفوں کو تونے منسوخ کر دیا ہے
وہ جس کا نامِ حسیں ہے قرآں وہی ہے اب ترجمان تیرا
عتیقؔ اک بد نصیب شاعر جو حرف و لفظ و بیاں سے قاصر
ہیں اس کے جذبات تجھ پہ ظاہر وہ بے نوا بے زبان تیرا