نسیمؔ بستوی
دینِ مبین صادق، قرآں کلام تیرا
ہے معتبر الٰہی محکم نظام تیرا
کرتے ہیں ناز اپنی قسمت پہ ہم الٰہی
ہم کو ملا رسولِ خیرِ انام تیرا
لعل و گہر سے خالی دامن کو بھرنے والے
سلطان ہفت کشور بھی ہے غلام تیرا
ہم کو بھی اپنی رحمت سے با مراد کردے
ہے مرکزِ خلائق دربار عام تیرا
اصحابِ مصطفی کا دے جذبۂ اطاعت
بھولیں کبھی نہ یا رب کوئی کلام تیرا
آباد ہو کہ ویراں صحرا ہو یا گلستاں
سنتے ہیں گونجتا ہے ہر وقت نام تیرا
یا رب نسیمؔ کو وہ جوشِ عمل عطا کر
جس سے کہ نشر کر دے ہر اک پیام تیرا
0 تبصرے