Shah Ke Darbar Me Faizan Ki Barish Huwi > Naat > Dr Aziz Ahsan

نعت 

شاہﷺ کے دربار میں فیضان کی بارش ہوئی 

عاصیوں پر بے طرح احسان کی بارش ہوئی 

جب طبیعت پر َتکَدُّرْکا ذرا سایہ پڑا 

انشراحِ صدر کے سامان کی بارش ہوئی 

مدح کے اشعار لکھنے کی سعادت بھی ملی

حرف کی تکریم کے عرفان کی بارش ہوئی 

شاہِ طیبہ کی نگاہِ ناز کا صدقہ ملا 

نورونکہت کی نرالی شان کی بارش ہوئی 

حاضری بارِ دگر چاہی تو کشتِ روح پر 

اُنؐکی رحمت کے طفیل ،امکان کی بارش ہوئی 

مرشدی قاضی شفیق احمد (رحمۃ اللہ علیہ)٭٭کی یاد آنے لگی

اور کچھ کیفیَّتِ حرمان٭ کی بارش ہوئی 

ق

آیہء قرآں سے پایا قلب نے بے حد سکوں 

دل پہ کُلُّ مَنْ عَلَیْہَا فَان کی بارش ہوئی 

روضہء سرکارﷺ پر اشعار جب لکھے عزیزؔ

فیضِ فَنِّ حضرتِ حسانؓ کی بارش ہوئی 

٭اعلان نون میں جائز سمجھتا ہوں۔ 

٭٭حضرت خواجہ قاضی شفیق احمد فاروقی القادری، چشتی نظامی المدنی قُدِسَ سَرَّہٗ السَّامِیْ  جن کی بختِ رسامیں جنت البقیع  کی رشکِ فردوس زمین لکھی تھی!

(مسجدِ نبوی شریف میں لکھی گئی۔پاکستان میں رویتِ ہلال کی نسبت سے ۹؍رجب ۱۴۳۶ھ؁…بدھ :۲۹؍اپریل ۲۰۱۵ء؁)

عزیزؔ احسن  (ڈاکٹر عزیز احسن۔

 A-12 ، بلاک 13 ،

 گلستانِ جوہر، کراچی۔ پوسٹل کوڈ: 75290 )  

email: [email protected]